Jam 5 | BEF | STEP | Lenali fe'noho bona'magita ya'ma kaga lipoti lu nolepugi kehelilo. Fe'nohi ufeha'a hiti nasana lenalitoga huto hilinana'mu ya'ma nekehelite yibi sipi hilo.

James 5

Yogo fe'noho bona'magi kumu kaga

1 Lenali fe'noho bona'magita ya'ma kaga lipoti lu nolepugi kehelilo. Fe'nohi ufeha'a hiti nasana lenalitoga huto hilinana'mu ya'ma nekehelite yibi sipi hilo. 2 Fe'nohatini afulupa noina yabe. Gukete lamana'a ya'ma gunako'magi a'ne su nehanagihe. 3 Lenali efahatini goli hiti siliba hiti golo notabe. Yanauba efahi li hetofa hite mine'ahana yamofihi hapa'a aliha'a huto huloto logomofihi suhi huto lenali lenugufatini hiti fe'nohatini hiti moneko kumu lalana'mu yabe. Fe'nohi li nupa hite mele'ahanaya, metoga nasana su halina kana'a hupamone hu'ehina, menekehelifiye? 4 Lenali foyagu lili'nalo bomagi enogobi foya lite kifi'a laga hilago meetana suhi lite mina'a meepigo foya lelite bite yibi hafili hago amuya bo, Hu'mau ya'ma foipana'ani ekesaguti keheliloto ya'ma luto nolibe. 5 Lenali ya'ma metoga hite melete nehite lag'a nekehelite enibita hina'a hiti kehelite nehanaya to nose'na neba neba hite fobatini'ubago hu'ehina Hu'mau lenahalina kana'a lebato'isi ahuto hilube'mu nohibe. 6 Lenali bati hite nehana bona'i enifisa ite ka foya epilete neenahago enali nona'a lenahalana'a hiti lenifitu falana'a hiti meni'ibe. Lenali yogo fe'noho bona'magi ya'ma ka kehelilo.

Kosele kasele melepahago Hu'mamofitoga loka helata nehana

7 Nalalu'nigita, Sipi Bo i behe huto alina kana'amu kosele kasele'i melenehenogo ai kumu bati hite minalo. Lenali akeheli'ahabe. Biha'a ho kefe'ahana bomagi foya'ani he kelelete kohe toto noina ko'i hiti to alihi noina ko'i hiti ilago nose'na kana huto huloto nose'na legeya'a lamana'a nalune lite kosele'i mehese minelata nehabe. 8 Sipi Bo i behe huto nehetilina kana'a tupa hu'ehibe. Ya'mu lenali hiti kosele'i mehese komopatini molo hetofa hite minalo.

9 Nalalu'nigita, ka foya li letalina bo, Hu'mau ya'ma lebato'isi nohibe. Ya nohuto nehetilina'mu ka foya li lalagi lenali ai ka emekinogo ai ka emekinogo mehilo. 10 Nalalu'nigita, kalana'i nemele epalago kosele ka melise Sipi Bomofitoga molo emite gi'a hete minelata nehana'a mone y'ama Hu'mamofihi mono ka leli'ali hi'ahana bo ya suhi hite koyapa mine'ahana. Enali'ani hi'ahana'a ana suhi hite minalo. 11 Keheli'ahafihe? Enali ule'ale hite lite mine'ahana bomu'i ya'ma Hu'mau lusa gi epolo'ehina bo yabe, luto lulata nohune. Koyapa bouba Yopu ai keke'i luto minoto kosele'i mehago mino'ehina'a akeheli'ahabe. Aliha'a ya'ma Sipi Bouba ana'ina lamana'a molo eto'ehina ya'ma akeheli'ahabe. Yana'mu Sipi Bouba lalitoga ginaga fito bu goloto komopa'a limito lele'mo hetofa hu letalinamo ni'ibe. luto kehelilune.

12 Nalalu'nigita, kaga amuya'a hiti ka mone lilugi kehelilo. Kokulumagu lenayahi tite lu laga mehilo. To metoga to nasana'mu fato fato'i lenayahi tite kaga melete lu laga mehilo. Hu'mamofito ka foya li lalabe. Lenali ya'ma o'yo luto lilupi to o'e luto lilupi litemo yamofihi ka'a lama'naka lite lilo.

13 Folagahatiniguti moneuba keke'i luse'na gupisa'alo notigo nohuto'amo Hu'mamofitoga lino. To folagahatinigu moneuba gelo bise'na lito nohuto'amo Hu'mamofitoga fokehi hoto nama lino. 14 Folagahatinigu bo mone'i nobesinogo mono kaba bona'magihi kehe inogo nehetite Hu'mamofitoga loka hete Sipi Bomofihi gi'a hete mesebe nagami'i fele eteno. 15 Hu'mamofitoga enemehi emite keheli ule'ale hilete gi'a halana yamofihi Sipi Bouba le'mo hetofa hinogo besi'ehina bo ye koto ho tilina'mu yabe. Foipana'a ni'ilina yamofihi Hu'mau li he'mi etalina'mu yabe. 16 Hu'mau lele'mo ye kalibe lite nelitemo foipanatini ai he'mi etenogo ai he'mi etenogo lu hokolo hite Hu'mamofitoga lilo. Bati hite minalana bona'magi Hu'mamofitoga loka hete ya'ma ana'ina lamana'a lilana'mu yabe. 17 Koyapasana Elaiyau ya'ma lali suhi huto aisisigo ko'i meilibe luto amuya moloto Hu'mamofitoga ligo kufu loebe monebe higo luga'a ikahi nayahi mone kegi'a leke ho malago ko'i mei'ehina. 18 Meigo aliha'a ya'ma aku'i ko'i ilibe luto Hu'mamofihi loka hago kokulumaluguti ko'i igo metoga nasana asaga'i boloto ti su ho'ehina yabe.

19 Nalalu'nigitabe. Lenali folagahatiniguti moneuba mono kapo'mu bego hilina yamofi kumu lalu'afu moneuba le'mo gelehe hinogo nohuto, 20 ai'a ya'ma kaga ma luto kehelilibe. Moneuba foipana'a hiti bona'magihi kapo sibina'aguti le'moto oto hetofa kapolo le'mo malalina bouba ya'ma ana foipana'a hiti bomofihi meha'a hiti fili lalibe luto buto bito foipana'a hiti silaga'i li he'mi eto su halibe.